بۆ سەرپەرشتیکردنی ڕیفراندۆم و وتوێژکردن لەگەڵ بەغدایە
بۆ سەرپەرشتیکردنی ڕیفراندۆم و وتوێژکردن لەگەڵ بەغدایە

دوو لیژنە لە نوێنەرانی سەرجەم لایەنە سیاسییەکانی کوردستان پێکدێت

باسک نێت-ھەولێر

دوای کۆبوونەوەکەی ئەمڕۆ سێشەممەی ھەردوو مەکتەبی سیاسی یەکێتی و پارتی بە سەرپەرشتی مەسعود بارزانی، ھەردوولا راگەیاندراوێکی ھاوبەشیان بڵاو کردەوە و رایانگەیاند، بڕیاری پێکھێنانی دوو لیژنەی باڵایان داوە بە ئەندامیەتی سەرجەم نوێنەرانی پێکھاتە سیاسی و نەتەوەییەکانی کوردستان.

لە راگەیەندراوەکەدا ھاتووە کە لە تەوەری یەکەمی کۆبوونەوەکەدا، ئەو لیژنەیەی سەردانی بەغدای کردبوو، پوختەی سەردانەکەیان و ناوەرۆکی کۆبوونەوەکانیان لەگەڵ سەرۆک کۆماری عێراق و سەرۆکی پەرلەمان و سەرۆک وەزیران و ھێز و لایەنە سیاسییەکانی عێراق خستەڕوو.

لە ئەکامدا بڕیار درا لیژنەیەکی باڵا بە ڕاوێژکردن لە ھەموو لایەنە سیاسی و نەتەوەییەکانی کوردستان پێک بھێنرێت بۆ گفتوگۆکردن لەگەڵ ھێزە نیشتمانییە عێراقییەکان سەبارەت بە داخوازی و کێشەکان، بەتایبەتی لەم ھەلومەرجەی کە خەڵکی کوردستان ھەنگاو دەنێ بەرەو ریفراندۆم.

لە تەوەری دووەمی کۆبوونەوەکەشدا، ئەو لیژنەیەی کە تایبەت بە بابەتی ریفراندۆم راسپێردرابوو بۆ پەیوەندی و سەردانی حزب و لایەنە سیاسی و نەتەوەییەکانی کوردستان، ناوەرۆکی کۆبوونەوە و راو بۆچوونی لایەنەکانیان گەیاندە کۆبوونەوە، دوای شرۆڤە و لێکدانەوەی ھەمەلایەنەی بیروبۆچوونەکانی کە لەو سەردان و دیدارانەدا گەڵاڵە بووبوون، کۆبوونەوە بڕیاری دا ھەنگاوی پێویست بنێ بۆ پێکھێنانی لیژنەیەکی تایبەت لە ھەموو لایەنەکان بۆ سەرپەرشتیکردنی پرۆسەی ریفراندۆم و زەمینەسازی پێویست بۆ دابینکردنی پێداویستییەکانی پرۆسەکە بەشێوەیەکی گشتی.

ھەروەھا لە تەوەری سێیەمی کۆبوونەوەکەدا، ناوەڕۆکی کۆبوونەوەی ئەو لیژنەیەی کە راسپێردرابوو بۆ کۆبوونەوە لەگەڵ کۆنسوڵ و نوێنەری دەوڵەتان لە کوردستان بۆ ئاگادارکردنەوەیان لەو ھەوڵانەی لە ئارادایە بۆ پرۆسەی ریفراندۆم، خرایە بەر باس و گفتوگۆی لە بارەوە کرا و بە باش ھەڵسەنگێندرا کە بەسوپاسەوە ھەموویان بەشداری کۆبوونەوەی لیژنەکە بووبوون.

بە گوێرەی راگەیەندراوە ھاوبەشەکە، لە تەوەری چوارەمی کۆبوونەوەکەدا، گفتوگۆ لەسەر کۆی کێشە و گرفتە ناوخۆییەکانی ھەرێمی کوردستان کرا و تەئکید کرایەوە لەسەر چڕکردنەوەی ھەوڵەکانیان و بە ھاوبەشی خستنەگەڕی ھەموو وزە و تواناکانیان بۆ دۆزینەوەی رێگاچارە و پاڵپشتی رێکارە یاسایی و ھەنگاوەکانی دامودەزگا فەرمییەکان.

لە تەوەری کۆتاییشدا، کۆبوونەوە داوایەکی ئاراستەی کەسوکاری شەھیدان و پێشمەرگەکان و ھەموو ھێز و لایەنە سیاسی و رێکخراوەکانی کۆمەڵگای مەدەنی و میدیاکاران و تەواوی گەلی کوردستان کرد، کە لەم پرۆسە گرنگ و نەتەوەیی و نیشتمانییەدا ھاوکار و پاڵپشت بن.

ھەر لەم کۆبوونەیەدا ئەندامانی مەکتەبی سیاسیی یەکێتی ئەو نەخشەڕێگایەی ئامادەیان کردبوو، پێشکەشی مەکتەبی سیاسیی پارتییان کرد، لە کۆتایشدا بڕیار درا کۆبوونەوە ھاوبەشەکان بەردەوام بن.

بابەتی دواتر

786786

توركیا: رووبەڕووی هەموو هێرشێك دەبینەوە

سەرۆكوەزیرانی توركیا ئاشكرایكرد، هەوڵی دروستكردنی پشتێنەیەكی ئاژاوە لە باشووری وڵاتەكەمان، لەسەر سنوورەكانمان لەگەڵ عێراق‌و سووریا، …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *