7567567

لە هەرێمی كوردستان خۆپیشاندانی سەرتاسەری بۆ پشتیوانی لە مسوڵمانانی بۆرما ئەنجامدەدرێت

بڕیارە سبەی چوار شەممە لە زۆر شار و شارۆچكەی هەرێمی كوردستان، خۆپیشاندانی سەرتاسەری لە دژی كۆمەڵگوژی مسوڵمانەكانی بۆرما بەڕێوەبچێت.

بۆ ئەو مەبەستەو بۆ بەرەنگاربوونەوەی توندوتیژییەكان، چالاكوانانی مەدەنی نامەیەكی ناڕەزایەتی ئاڕاستەی ئەمینداری نەتەوە یەكگرتووەكان دەكەن.

لەوبارەوە یەحیا نەوزەر، چالاكوانی مەدەنی ڕاگەیاند، پێویستە هەر كەسێك لای خۆیەوە فشارێك درووستبكات، بەتایبەت لەڕێگەی تۆڕەكۆمەڵایەتییەكانەوە ئەوەی كراوە وایكردووە، ڕای گشتی بۆ ئەو بابەتە بجوڵێنێت.

ئاماژەی بەوەشدا، بەیاننامەیەكیان بەهەرسێ زمانی كوردی ‌و عەرەبی ‌و ئینگلیزی ئامادەكردووە و ئاڕاستەی ئەمینداری گشتی نەتەوە یەكگرتووەكانی دەكەن.

باسی لەوەشكرد، هەر بۆ پاڵپشتی بەیاننامەكە كۆمەڵێك ئیمزا كۆدەكەنەوەو هاوپێچی بەیاننامەكەی دەكەن، پاشان لەنزیكترین كاتدا لەچالاكییەكی مەدەنیدا پێشكەشی نەتەوە یەكگرتووەكانی دەكەن.
دەقی نامەی ناڕەزایەتییەكە:
بۆ: ئەمینداری گشتی نەتەوە یەكگرتووەكان لە رێگای نوێنەرایەتی نەتەوە یەكگرتووەكان لە عێراق
بابەت: ناڕەزایەتی دژ بە پاكتاوی رەگەزی گەلی رۆھینگا
ئەمڕۆ ویژدانی زیندووی دنیا و نەتەوە یەككرتووەكان و دەوڵەتان و میدیای ئازاد و ھەموو ھێز وكەسایەتیەكی ئینسان پەروەر لەبەردەم بەرپرسێارێتیەكی گەورە و تاقیكردنەوەیەكی مێژوویی ویاسایی ھەرە گەورەدان كە نابێت چیتر لەژێر ناوی ھیچ جۆرە پاساوێكدا لەبەرامبەر وەھا كارەسات وقڕگەیەكی مرۆیی قیزەوندا بێدەنگ وبێباك وبێھەڵوێست بین.

ئەمڕۆ ئێمەی كورد وەك نمونەی قوربانییەكی زیندووی پاكتاوی رەگەزی بەبیری دنیای دێنینەوە كە ھاسۆزییمان بۆ قوربانیانی بۆرما لەو ئەزموونە پڕلە ناسۆرەوە سەرچاوە دەگرێت كە لە ھەڵەبجە وئەنفالدا بەبەرچاوی زلھێزان وناوەندە نێودەوڵەتیەكانەوە لەنێو مردن وژیاندا ڕۆژانی مەینەتی ووێرانەیی وبرسێتی وكوشتن وسووتاندنمان دەگوزەراند. بۆیە چیتر بێدەنگ نابین لە قڕكردنی مرۆڤ بەدەستی مرۆڤ، وەختێك تاوانی كوشتنی كەسێك وەك بڕیینەوەی ڕەچەڵەكی مرۆڤایەتیە و ھیممەتی ژیاندنەوەی مرۆڤێكیش وەك ژیاندنەوەی تەواوی مرۆڤایەتیە. بۆیە داواكارین:
1.وەستاندنی هەموو شێوازەكانی كوشتن و ترس و تۆقاندن دژ بە گەلی رۆھینگار.

2.ئیدانەكردنی ئەو تاوانانە لەلایەن نەتەوە یەكگرتوەكانەوە.

3.فشار خستنەسەر وڵاتانی دراوسێ كە دەرگای سنورەكانیان واڵا بكەن بەڕووی خەڵكی سڤیلی هەڵهاتوو لە هەڵمەتی پاكتاوی رەگەزی سوپای میانمار.

4.نەتەوە یەكگرتوەكان ھەوڵەكانی دەوڵەت و دەسەڵاتدارانی میانمار بۆ قڕكردنی گەلی رۆھینگار بە فەرمی بە جینۆساید بناسێنێت و تاوانبارانیش بدرێن بە دادگای تاوانی نێودەوڵەتی ھەمیشەیی لەسەر ئەنجامدانی تاوانی جینۆساید.

بابەتی دواتر

786786

توركیا: رووبەڕووی هەموو هێرشێك دەبینەوە

سەرۆكوەزیرانی توركیا ئاشكرایكرد، هەوڵی دروستكردنی پشتێنەیەكی ئاژاوە لە باشووری وڵاتەكەمان، لەسەر سنوورەكانمان لەگەڵ عێراق‌و سووریا، …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *