453453535

پانۆڕامای زیان و قوربانییەكانی جەنگی داعش و هاوپەیمانان لە موسڵ

سەعد مەلا عەبدوڵڵا گوڵپی

چ شتێك لە موسڵدا ماوەتەوە؟

شەڕێكی قورس بۆ وەرگرتنەوەی شاری موسڵ لە دەست چەكدارانی داعش، ئەم شارە مێژووییەی عێراقی وێران كردو هەزاران كەسیش كوژران و ئەوانەشی رزگاریان بووە ئاوارەی ناوچەكانی دەرەوەی ئەو شارە بوون، لەم راپۆرتە دەمانەوێت بزانین لە شەڕی داعش و هێزەكانی عێراقی (لەژێر سەركردایەتی هێرشەكانی ئەمریكا) موسڵ چەند زیانی بەركەوتووە و دوای ئەمەش دەبێت چی بكرێت؟

كۆنتڕۆڵكردنەوەی موسڵ دوای 9 مانگ كۆتایی پێهات، بەڵام گرفتە ئینسانییەكان بەشێوەیەكیتر دەستی پێكرد.

شارێكی مێژوویی بە تەواوەی وێران بووە
ئاماری كوژراوەكان بە تەواوەتی دیار نییە، بەڵام هەزاران كەس تاكو دەیان هەزار كوژراون‌و زیاتر لە یەك ملیۆن هاووڵاتی لە تشرینی یەكەمی ساڵی 2016 لەكاتێكدا هێرشەكان بۆ كۆنتڕۆڵكردنەوەی موسڵ دەستی پێكرد ئاوارە بوون.

زۆرێك لە گەڕەكەكانی ئەو شارە بە تەواوەتی وێران بوون و تەرمەكانیش لەژێر بیناكاندا شاردراونەتەوەو شەقامەكانیش پڕن لە مینی چێندراو.

 

دەتوانرێت بوترێت، دووەمین گەورە شاری عێراق كە لە ساڵی 2014ەوە لەژێر كۆنتڕۆڵی داعش دا بوو بە تەواوەتی وێران بووە.

بەشێك لە چاودێرانی سیاسی لەو باوەڕەدان كە شەڕی موسڵ گەورەترین شەڕێك بووە لەدوای جەنگی جیهانی دووەم.

چیرۆكی دوو شار
لە كۆتا راپۆرتی رێكخراوی نەتەوە یەكگرتووەكان سەبارەت بە موسڵ ئاماژە بۆ ئەوە دەكەن، هەموو ناوچەكانی شارەكە بەشێوەیەك لە شێوەكان تووشی زیان بوون، بەڵام بەشی رۆژئاوای شارەكە كە لە مانگی حوزەیرانی 2017 كۆنتڕۆڵ كرایەوە زیاتر لە بەشی باكور كە شەش مانگ پێشتر كۆنترڵكرایەوە وێران بووە.

بەشی رۆژئاوای موسڵ لە 54 گەڕەك پێكهاتووە و نیوەی ئەم گەڕەكانە بە تەواوەتی وێران بوون.

بەپێی ریزبەندی نەتەوە یەكگرتووەكان 15 گەڕەكیان زیانێكی زۆر گەورەیان پێگەیشتووە كە زۆربەی ئەو بینایانەن كە بۆ نیشتەجێبون نابن.

لەو 39 گەڕەكەیتریش، 23 گەڕەكیان بەشێوەیەكی مامناوەند زیانیان بەركەوتووە بەشێوەیەك نیوەی بیناكانی وێران بووە یان بۆ ژیان دەست نادات، لە 16 گەڕەكیتریش بە كەمترین شێوە وێران بوون و زیانیان بەركەوتووە.

سێ رۆژ بە تەواوەتی بە تەنها بووم و رەنجم دەكێشا، بەڵام كەسێك نەبوو گوێی لە دەنگم بێت، بە هەموو شێوەیەك هاوارم دەكرد، دایكە! دایكە! بەڵام وەڵامی نەبوو، تا ئەوكاتەی رزگاریان كردم نەمدەزانی كە دایكم گیانی لەدەست داوە.

ئەمیرە، كچێكی 10 ساڵانە كە لە خانویەكی وێرانبووی موسڵی كۆن رزگاری بوو.

رێكخراوی نەتەوە یەگرتووەكان ئاشكرایدەكات، نزیكەی 10 هەزار بینا روخاون یان بە تەواوەتی وێران بوون، بەڵام خاڵی سەرەكی لێرەدا ئەوەیە كە توێژینەوەی نەتەوە یەكگرتووەكان بەهۆی مانگی دەستكردەوە بووە و ئەگەری ئەوە هەیە ئەم وێرانكارییە زیاتر بێت.

هەرچەندە بەپێی مانگە دەستكردەكە بێت سەرجەم بینا چەند نهۆمییەكان نابینرێن بۆیە بەپێی پێشبینییەكان نزیكەی 32 هەزار بینا روخاون.

لیز گراند بەرپرسی كۆمەكی مرۆڤدۆستانەی رێكخراوی نەتەوە یەكگرتووەكان لە عێراق لەو باوەڕەدایە بۆ نۆژەنكردنەوی شاری موسڵ چەندین ساڵی پێویستە.

وتیشی، نۆژنەكردنەوەی موسڵ‌و گەڕانەوەی سەرجەم ئاوارەكانی ئەوشارە بۆ خانوەكانیان زۆر دژوارەو نزیكەی یەك ملیار دۆلار خەرجی دەوێت.

بینا روخاوەكانی لە تشرینی یەكەمی 2016 تاكو حوزەیرانی 2017

ژمارەكان بەپێی توێژینەوی مانگە دەستكردەكانی نەتەوە یەكگرتووەكانە

پێش هێرشەكە..
135 بینا وێران بوون كە 50%یان بینای حكومی بوون و 50% بینای نیشتەجێبوونی هاووڵاتیان.

پێش ئەنجامدانی ئۆپەراسیۆنەكانی كۆنتڕۆڵكردنەوەی موسڵ زۆرێك لە بینا حكومییەكان وێران بوون بە تایبەت بینای سەربازی و فڕۆكەخانە و زانكۆی موسڵ.

پێنج مانگی سەرەتای هێرشەكە…
1240 بینا وێران بوون كە 47% بینای نیشتەجێبوونی هاووڵاتیان بوون.

سەرەتا ئۆپەراسیۆنەكان لە شەقامەكان‌و كارگەكانەوە دەستیان پێكرد، بەم شێوەیە هەر پێنج پردەكەی موسڵ لەسەر رووباری دیجلەو نزیكەی نیوەی بیناكانی نیشتەجێبوون زیانیان بەركەوت.

دوای هەشت مانگ…
4356 بینا وێران بوون كە 70% بینای نیشتەجێوون بوون.

لە مانگی مارس تاكو حوزەیرانی 2017 ژمارەی بینا روخاوەكان نزیكەی چوار هێندە زیادیان كرد، بەشێوەیەك لە هەر 10 بینای روخاو 7 خانوی نیشتەجێبوونی تێدابوو.

دوای 9 مانگ…
9159 بینا روخان، كە 85% بینای نیشتەجێبوون بوون.

لە هەفتەكانی كۆتایی ئۆپەراسیۆنی كۆنتڕۆڵكردنەوەی موسڵ زیاتر لە 5000 بینا وێران بوون‌و نزیكەی 98% بینا روخاوەكانی بینای نیشتەجێبوون بوون‌و زۆربەی ئەوانەش كەوتوەنەتە موسڵی كۆن‌و مزگەوتی گەورەو ناسراوی نوری لەو نێوەندەدا وێران بوون.

بەپێی هەڵسەندگاندنی سەرەتایی نەتەوە یەكگرتووەكان بە پشتبەستن بە مانگە دەستكردەكانیان ئەوە نیشان دەدەن، خانووی هاووڵاتیان لە هەموو بیناكانیتر زیاتر وێران بوون‌و زیانیان بەركەوتووە، لانی كەم 8500 بینای نیشتەجێبوون زیانی گەورەیان بەركەوتووە یان بە تەواوەتی وێران بوون، زۆرترینیشیان لە موسڵی كۆن بوون، ئەم ژمارەیەش زۆر وورد نییە، چونكە نەتوانراوە كۆڵان بە كۆڵان توێژینەوەیەكی وورد بكرێت.

جیا لە بیناكان نزیكەی 130 كیلۆمەتر لە شەقامەكانی ئەو شارە خراپ بوون كە 100 كیلۆمەتری دەكەوێتە بەشی رۆژئاوای موسڵ.

لەگەڵ ئەوەشدا هێزەكانی هاوپەیمانان هەموو ئەو پردانەی كە رۆژهەڵات‌و رۆژئاوای شارەكە بەیەكەوە دەبەستەوە بۆردومان كردووەو ئەو پەیوەندییەیان نەهێشتووە، بۆ ئەوەی داعشەكان نەتوانن كۆمەك رەوانەی چەكدارەكانیان بكەن لە بەشی باكوری موسڵ، جگە لەوانەش فڕۆكەخانەكان‌و وێستگەی شەمەندەفەرو نەخۆشخانەكانی ئەو شارە بە تەواوەتی وێران بوون.

بەرپرسانی عێراق ئاشكرایدەكەن، نزیكەی 80%ی كۆمەڵگەی پزیشكی موسڵ وێران بووە، ئەم كۆمەڵگەیە چەندین نەخۆشخانەو بەشی پزیشكی زانكۆی موسڵ‌و چەند تاقیگەی تێدا بوو.

ئەو بینایانەی وێران بوون
ژمارەكان بەپێی توێژینەوەی مانگە دەستكردەكانی نەتەوە یەكگرتووەكانەوە لەوێوە وەرگیراون‌و زیاتر لە 80%ی بینا وێران بووەكان خانووی هاووڵاتیان بوون، بەم شێوەیە:

-8475 یەكەی نیشتەجێ بوون
-735 شەقام و پرد
-397 یەكەی بازرگانی‌و پیشەسازی
-352 بینای حكومی
-18ناوەندی وەرزشی‌و گەشتیاری
-25 بینای سەربازی‌و ئاسایش
22-شوێنی مەزهەبی‌و ئایینی
بە گشتی 9925 شوێن‌و ناوچە لە موسڵ وێران بوون.

لە هەفتەكانی كۆتایی ئۆپەراسیۆنی كۆنتڕۆڵكردنەوی موسڵ، موسڵی كۆن لە هەمووی زیاتر وێران بووە، هێزە عێراقییەكان لەم گەڕەكەدا چەكدارە داعشەكانیان گەمارۆ دابوو.

كاتێك شەڕەكە قورستر بوو، هەزاران دانیشتووی ناوچەكە لە ماڵەكانیان گیریان خواردو دووچاری بەدخۆراكی بوون یان بریندار بوون یان تووشی نەخۆشی دەروونی بوون.

یەكەمین ژنێك بووم كە ئاڕایشتگام كردەوە، هەستم بە ئەنانییەت دەكرد، كەسانی دەوروپشتیشم هۆشداری ئەوەیان پێدام كە كارەكەم مەترسیدارەو لەوانەیە تووشی كێشەم بكات، بەڵام خۆشبەختانە تووشی هیچ كێشەیەك نەبوومەوە.

جومنە نەجیم عەبدوڵڵا ئاڕایشتگایەكی لە رۆژئاوای موسڵ كردەوە‌و هاوكارەكەشی ناوی ئەمیرە بوو، كە دایكی بەهۆی بۆردومانەوە كوژرابوو تەنها خۆی مابوویەوە.

دەڵێت، دایكم بانگ دەكردو دەموت وەرە یارمەتیم بدە، بەڵام وەڵامی نەدەدامەوە، خۆشم نەمدەتوانی بجوڵێمەوە.

باوكم كەمێك لەوەو پێش خانەوادەكەمان كە براو خوشكی بچوكترم هەبوو ئەوانی بردبوو، بەڵكو لە شار دەرچن، جگە لە ئەمیرە‌و دایكی كە كوژرابوو كەسێكیتر لە ماڵەوە نەمابوو.

ئەو كچە خۆی باسی روداوەكە دەكات‌و دەڵێت، نە ئاو هەبوو نە خۆراك، سێ شەو و رۆژ بە تەنها بووم، هەموو كەسم بانگ دەكرد، بەڵام كەس گوێی لە من نەبوو، دەموت دایكە؟ بەڵام وەڵامی نەبوو تا ئەوكاتەی رزگارییان كردم نەمزانی بوو مردووە.

ئەمیرە لەژێر چارەسەری پزیشكیدایە، بەڵام نازانێت باوكی‌و خوشك‌و براكانی چییان لێهاتووە.

لە موسڵ هاوشێوەی ئەمیرەو خێزانەكەی زۆر زۆرە.

لە وێنەكانی مانگە دەستكردەكان ئەوە بەدەست خراوە زیاتر لە 5500 بیناو خانوو لە كۆی 16000 خانووی نیشتەجێبوون لە موسڵی كۆن بە تەواوەتی وێران بوون، بەپێی زانیارییەكان 490 خانوو لە هەفتەكانی كۆتایی ئۆپەراسیۆنەكەدا وێران بوون.

هەڵەبەتە لەو بارەوە ئامارێكی تەواوەتی بوونی نییەو لەوانەیە زیانەكان زۆر لەوە زیاتر بن.

زیانەكانی لە حوزەیرانی 2017
وێنەی مانگە دەستكردەكان ئەوە نیشان دەدەن، هەزاران بیناو خانوو و زیاتر لە 100 كیلۆمەتر شەقام بە تەواوەتی وێران بوون.

یەكێك لە شوێنە گشتی‌و تایبەتییەكانی ئەم شارە وێران بووە، مزگەوتی نووری بوو، هەر لەم مزگەوتەدا بوو ئەبوبەكر بەغدادی لە ساڵی 2014 خەلافەتەكەی راگەیاند.

هێزە عێراقییەكان دەڵێن، داعش مزگەوتی نوری تەقاندوەتەوە، داعشیش دەڵێت، بەهۆی هێرشە ئاسمانییەكانی ئەمریكاوە وێران بووە، بەڵام هیچ بەڵگەیەك بۆ پشتڕاستكرنەوەی ئەوە بوونی نییە.

گڵی دەستی كە لە عەرەبدا بە (الحدبا) ناوبانگی هەیە مزگەوتەكە كە لە سەدەی دوازدەیەمەوە وەك مێژوویەكی شارستانی بەجێمابوو، زیاتر لە 800 ساڵ مابوویەوەو سەرئەنجام لە 22ی حوزەیران 2017 لەناوبرا.

كۆچكردنی بەكۆمەڵی هاووڵاتیان
ئۆپراسیۆنی موسڵ لە هەموو شتێك زیاتر زیانی بە هاووڵاتیانی سڤیل دابوو بەشێوەیەك تا ئێستا هیچ زانیاریی و ئامارێكی وورد لەسەر كوژرانی هاووڵاتیانی ئەو شارە بوونی نییە.

رێكخراوی نەتەوە یەكگرتووەكان لە ژانویە 2017 ژمارەی قوربانیانی بە 2463 كەس ئاشكراكرد، بەڵام بەرپرسانی ناحكومی رێكخراوی لێبوردنی نێودەوڵەتی دەڵێن 5805 كەس لە هێرشە ئاسمانییەكانەوە كوژراون، لەلایەكیتریشەوە رۆژنامەی ئیندیپندنت زانیاری لە پێگە كوردییەكانەوە وەرگرتووە و نوسیوێتی، نزیكەی 40 هەزار كەس لە موسڵ گیانیان لەدەست داوە.

بەڵام راستیەكەی ئەوەیە تا ئێستا لەژێر خانووە وێرانبووەكاندا جەستەی مردووەكان دەهێنرێتە دەرەوەو تا ئێستا ئامارێكی وورد نییەو بەم زوانەش ئەو ئامارە بەدەست ناخرێت.

بەپێی ئاماری نەتەوە یەكگرتووەكان لە تشرینی یەكەم 2016 و دەستپێكردنی ئۆپەراسیۆنی كۆنتڕۆڵكردنەوەی موسڵ نزیكەی ملیۆنیك هاووڵاتی شارەكەیان جێهێشتووە، واتە نزیكەی نیوەی هاووڵاتیانی شارەكە پێش شەڕ لە شارەكەو نیوەشیان منداڵ و نزیكەی 700 هەزار كەسیشیان دانیشتوی رۆژئاوای موسڵ بوون.

پسپۆڕان ئاشكرایدەكەن، ئەو دەستدرێژییەی كرایەسەر موسڵ لە مێژووی هاوچەرخدا هاوشێوەی نەبووە.

بەپێی راپۆرتی نەتەوە یەكگرتووەكان، (IOM) تا سەرەتای مانگی ئاب زیاتر لە 800 هەزار كەس ئاوارە بوون كە زۆرێكیشیان لە كەمپەكان نیشتەجێ بوون‌و هەندێكیشیان بەرەو شارەكان كۆچیان كردووە یاخود شوێنێكان بە كرێ گرتووە، یاخود لە خانووە روخاوەكاندا یان لە ماڵی خزمەكانیان ژیان بەسەر دەبەن.

زیاتر لە 400 هەزار كەس لە كەمپەكان نیشتەجێن
زۆرترین خولی كۆبەران لە شاری موسڵ لە مانگەكانی ئۆپەراسیۆنی ئەو شارە بوو، بەپێی ئاماری نەتەوە یەكگرتووەكانیش لە هەشت مانگی كۆتایی ئەمساڵ حەوت هەوار خێزان خانوەكانیان چۆڵ كردووە.

لە مانگی دوای مانگی حەزەیران ئەم ژمارەیە بۆ 125 هەزار خێزان زیادیكردووەو دواتری ئەو ژمارەیە بۆ 14 هەزار خێزان هەڵكشاوە.

هەڵەبەتە هەرچەندە زۆرێك لە هاووڵاتیان شارەكانیان جێهێشتووە، بەڵام ئەو كەسانەی خانوەكانیان وێران بوون و لە شارەكانیشان دەرنەچون، زیاتر لە 100 هەزار خێزان دەبن كە موسڵ ماونەتەوەو بێ خانە و لانەن.

بەو شێوەیەی رێكخراوە پەیوەندیدارەكانی نەتەوە یەكگرتووەكان ئاماژەیان بۆ كردووە، قەرەباڵغی بەشی رۆژهەڵاتی شارەكە دوو هێندە زیادی كردووە، ئەو خێزانانەی لە بەشی رۆژئاواوە تووشی زیان بوون و هەڵهاتوون لەگەڵ دۆستانیان لە بەشی رۆژهەڵات ژیان بەسەر دەبەن و ئەوەشیان پێ خۆشترە تاكو لە كەمپەكاندا ژیان بەسەر بەرن.

یەكێك لەو كەسانە ناوی جەمانە عەبدوڵڵایەو تەمەنی تەنها 35 ساڵەو ئاڕایشتگای هەیەو خانوەكەی لە بەشی رۆژئاوای موسڵەو لەگەڵ خێزانەكەی لەبەشی رۆژهەڵات دەژێن.

جەمانە لە هاوسەرەكەی جیابوەتەوە، لە خولی حكومەتەكەی داعشدا كارەكەی قەدەغە بوو، بەڵام ئەو موشتەرییانەی كە دڵنیابوو لێیان و ناسراوییان هەبوو دەڕۆیشتنە لای‌و كەمێك پارەی بەو شێوەیە پەیدا دەكرد، لە ئێستاشدا كە داعش رۆیشتووە ناوبراو بینایەكی بە كرێ گرتووەو خەریكی كارەكەی خۆیەتی.

ئاماژە بۆ ئەوەش دەكات، یەكەمین كەس بووم گەڕامەوە سەركارەكەم‌و زۆریش رازیم، لەكاتێكدا هاووڵاتیان دەیانوت ئەم كارەی تۆ مەترسیدارەو لەوانەیە تووشی كێشەیەكەم بكەن، بەم خۆشبەختانە تا ئێستا هیچ كێشەیەكەم نییە.

جەمانە دەڵێت، لەبەر ئەوەی كچەكەی لە قوتابخانەیە، لە بەشی رۆژهەڵاتی موسڵ دەمێنێتەوە، هەرچەدە خانووی خۆم نییە بەڵام دەمێنمەوە ‌و خانوەكەمان لە رۆژئاوا خراپ بووە.

بەڵام زۆرێك لە خێزانەكان بڕیاریانداوە بگەڕێنەوە بۆ موسڵ بەتایبەت ئەوانەی شارەكەیان جێهێشتووە، نزیكەی 300 لەو خێزانانە بەرەو بەغدا رۆیشتوون‌و نزیكەی 2000 خێزانیش بەرەو هەولێر كە كاتژمێر و نیوێك لە رۆژهەڵاتی موسڵەوە دوورە، هەروەها نزیكەی 1000 خێزانیش بەرەو ناوچەكانی سەلاحەدین رۆیشتوون.

هاووڵاتیانی كوێ هەڵهاتوون
مانگی تشرینی یەكەمی ساڵی 2016 كە ئۆپەراسیۆنی كۆنتڕۆڵكردنەوەی موسڵ دەستی پێكرد، داعش هێشتا ناوچەیەكی زۆری لە باكوری عێراق لەبەردەستدا بوو، لەبەرئەوە زۆربەی ئەو كەسانەی هەڵدەهاتن بەرەو باشوور دەڕۆیشتن.

ووردە ووردە سوپای عێراق ناوچەكانی ژێر دەسەڵاتی داعشی وەرگرتووە، ئەو كەسانەی هەڵهاتبوون دەیانتوانی بگەڕێنەوە ئەو شارانەی كە لە موسڵەوە نزیكترن و لەوێ نیشتەجێ ببن.

كۆی كۆچبەرانی شاری موسڵ لەكاتێكدا بە تەواوەتی زانرا كە شارەكە لە داعش وەرگیرایەوەو نزیكەی 126 هەزار خێزان لە شەرێكی 9 مانگیدا بێ خانە و لانە مانەوە، لەم رێژەیەش زیاتر لە 80% لەناو شاری موسڵ یان شارەكانی دەرەوبەری موسڵ مانەوە.

ئایندەی موسڵ
لە ئێستادا كە موسڵ لە داعش وەرگیراوەتەوە، حكومەتی عێراق و هاوپەیمانەكانی دەتوانن شارەكە ئاوەدان بكەنەوە.

بەڵام هۆكارەكانی ئەم كارە گەورەیە بەتایبەتی لە بەشی رۆژئاوای موسڵ و ئەگەری هەیە چەندین ساڵ بخایەنێت‌و ملیارەها دۆلاریش خەرجی بوێت، لەپێش هەمووشیانەوە گەڕانەوەی دۆخی ئەمنییە بۆ شارەكەو هاووڵاتیانی نیشتەجێی.

هەنگاوی یەكەم دۆزینەوەو دەرهێنانی تەرمەكانە، هەروەها لەناوبردنی شانە نوستووەكانی داعش و دەستوپێوەندەكانیان، هەڵەبەتە كاركردن بۆ خزمەتگوزاری‌و پاكسازی شارەكە لە گرنگترین هەنگاوەكانی ئەو كارەیە.

موسڵ دوای چەندین مانگ لە بۆدومانكردنی وەك ئەوەی ئێستا دەبینرێت وێران بووە، بەڵام بەپێی هەندێ راپۆرتی نێودەوڵەتی چەكدارەكانی داعش ئەوشارەیان مین رێژكردووەو بەو هۆیەوە شارەكە تەواو وێران بووە.

بەو شێوەیەی كە بەرپرسی یەكەی هەماهەنگی ئۆپەراسیۆنی مینرێژی نەتەو یەكگرتووەكان ئاماژەی بۆ دەكات، لە تشرینی یەكەمی ساڵی 2016 كردەی پاكسازی شارەكە دەستی پێكردو نزیكەی 1700 كەس بەهۆی ئەو مینانەوە كوژراون یاخود بریندار بوون.

نینا سیچاران سەرۆكی رێكخراوی خێرخوازی بەریتانی (MAG) مانگی حوزەیران لە راگەیەندراوێكدا ئاشكرایكرد، بیست ساڵ لەمەوپێش مینڕیژی لەوشێوەیەی لە موسڵ بینراوە رووینەداوە.

ئەو رێكخراوە نزیكەی سێ هەفتەیە لە گوندێكی رۆژهەڵاتی موسڵ 250 مینیان هەڵگرتوەتەوە بەشێوەیەك هەندێك لە مینەكان هێندە هەستیار بوون كە بە هەنگاونانی منداڵێك دەتەقینەوەو لە هەمان كاتدا هێندە بەهێز بوون ئۆتۆمبێلێكیان لەناو دەبرد.

لەگەڵ هەموو ئەو كێشانە نابێت بابەتێكیتر لەبیر بكەین كە موسڵ شارێكی سوننە مەزهەبەو حكومەتی بەغداش شیعە مەزهەبن‌و زیاتر بیر لە بەرژەوەندییەكانی خۆی دەكاتەوە، لەبەرئەوە دەبێت حكومەتی عێراق بۆ جارێكیتر متمانەی هاووڵاتیانی شارەكە بەدەست بهێنێتەوەو بۆچونێكی نوێی حكومەت بە رووی ئەواندا بكاتەوە.

زۆرێك لەو گروپە فریادڕەسانەی لە موسڵ كار دەكەن، ئاماژە بۆ ئەوە دەكەن، زۆرێك لە هاووڵاتیان لەبەر ترسی تۆڵەسەندنەوە ناوێرن بگەڕێنەوە شارەكەیان.

ئیبراهیم موستەفا لە گەڕەكی زهور خەریكی پاكردنەوەی شەقامەكانەو لەو باوەڕدایە بەم شێوەیە خۆشەویستی بۆ شارەكەی دەتوانێت شارەكەی پاك بكاتەوە.

ئاماژە بۆ ئەوەش دەكات، ئێمە موسڵییەكان هەموو شتێكمان لەدەست داوە، خانو، ژیان، كار، بەڵام روحمان لەدەست نەداوە، گەڕەكەكان هاوكاری یەكتر دەكەن، ئەمە رێگای یارمەتیدانە تاكە رێگەی رێكخستنەوەو نۆژەنكردنەوەی شاری موسڵە.

بابەتی دواتر

5675675675

پەرلەمان دەنگدانی بۆ كاندیدانی كۆمسیۆنی هەڵبژاردنەكان كرد

  ئەمڕۆ دوو شەممە، ئەنجومەنی نوێنەرانی عێراق 9 كاندیدی بۆ ئەندامانی نوێی كۆمسیۆنی باڵای سەربەخۆی …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *