456456456

پانۆڕامای ژیانی عەلی عەبدوڵڵا ساڵح سەرۆكی پێشووی یەمەن

 

عەلی عەبدوڵا ساڵح لە 21 ئازاری 1942 لە گوندی بێت ئەحمەری ناوچەی سەنحانی سەر بە پارێزگای سەنعای پایتەخت لە خێزانێكی هەژار لەدایك بووە.

دوای مردنی باوكی خێزانەكەی ڕوبەڕوی هەژاری‌و نەبونیەكی زۆر بۆتەوە‌و بۆ ماوەیەكی دورودرێژ كاری شوانی كردووەو سەرەتای خوێندنی لە گوندەكەی خۆی تەواو كردووە، دواتر گوندەكەی جێهێشتوەو لە ساڵی ١٩٥٨ كاتێك تەمەنی 16 ساڵان بووە پەیوەندی كردووە بەڕیزەكانی سوپای وڵاتەكەیەوە.

هەر لەو ساڵەدا پەیوەندی كردووە بە ڕیزی پۆلی ئەفسەرانی هێزە چەكدارەكانی یەمەنەوە‌و لە ساڵی 1963 پلەكەی بەرزكراوەتەوە بۆ ئەفسەری پلە دوو دواتر لە ساڵی 1964 چۆتە كەتیبەی زرێپۆشی سوپاو پسپۆڕی لە جەنگی زریپۆشدا بەدەستهێناوەو دواتر بۆتە فەرماندەی لیوای پارێزگای تەعزو لەوكاتەوە توانیویەتی پەیوەندیەكی پتەو لەگەڵ شێخ‌و سەرۆك هۆزەكانی باكوری یەمەندا دروستبكات.

دوای ئەوەی بۆتە ئەندامی ئەنجومەنی سەركردایەتی یەمەن، لە ساڵی 1978 دا بۆتە سەرۆك كۆماری یەمەن‌و فەرماندەی گشتی هێزە چەكدارەكان.

لە 30 ئابی 1982 بۆتە ئەمینداری گشتی پارتی كۆنگرەی گشتی گەلی دەسەڵاتداری یەمەن‌و لە ساڵی 1983 جارێكیتر بۆتەوە بەسەرۆك كۆمارو فەرماندەی گشتی هێزە چەكدارەكان.

لە ساڵی 1988 بۆ جاری سێیەم لەلایەن ئەنجومەنی شورای گەلەوە بۆتەوە بەسەرۆك كۆمار‌و فەرماندەی گشتی هێزەچەكدارەكان.

عەلی عەبدوڵڵا ساڵح لە ساڵی 1979 پلەی ماستەری فەخری لە زانستی سەربازیدا پێبەخشراوە‌و لە ساڵی 1990 بە كۆی دەنگی ئەنجومەنی شورا پلەی فەریقی پێبەخشرا.

لە ساڵی 1994 بۆ جاری چوارەم بۆتەوە بەسەرۆك كۆماری یەمەن‌و بەهۆی ئەوخزمەتانەی كردویەتی بە وڵاتەكەی لە ساڵی 1997 دا پلەكەی بەرزكراوەتە بۆ موشیر.

لە یەكەم هەڵبژاردنی سەرۆكایەتیەدا كەبەشێوەی ڕاستەوخۆ دەنگ بدرێت بۆ سەرۆك كۆمار لە ساڵی 1999 جاری پێنجەم پۆستی سەرۆك كۆماری وەرگرتۆتەوە‌و ماوەی سەرۆكایەتیەكەی لە ساڵی 1978 درێژ دەبێتەوە تا ٥ی مانگی حوزەیرانی 2011 كاتێك بەهۆی بۆردومانی كۆشكی كۆماریەوە بریندار دەبێت‌و ڕەوانەی عەرەبستانی سعودیە دەكرێت بۆ چارەسەركردن‌و پۆستەكەی بە جێگرەكەی دەسپێرێت.

بەهاری عەرەبی و شەڕی ناوخۆی یەمەن
دوای سەرهەڵدانی ناڕەزایەتییەكان لە ژمارەیەك لە ولاتە عەرەبییەكان و كەوتنی ژمارەیەك لە دەسەلاتدارانی ئەو وڵاتە، لە 29ی ئایاری 2011 شەڕ لە نێوان هێزەكانی سەر بە عەلی عەبدوڵا ساڵح و خۆپیشاندەران ڕوویدا، دوای ساڵێك خۆپیشاندان و ناڕەزایی و چەندین ڕوبەڕوبونەوە، سەدان كەس لە هەردوولا كوژران و برینداربوون.

دواجار بە دەستپێشخەریی وڵاتانی كەنداو، عەلی عەبدوڵڵا ساڵح ناچاركرا دەسەڵات ڕادەست بكات و عەبد ڕەبە مەنسور هادی جێگری پۆستی سەرۆكی وەرگرت بۆ قۆناغی گواستنەوە تا ئەنجامدانی هەڵبژاردنەكان، بەڵام لەسەركارلادانی ساڵح شەڕ لە یەمەن كۆتایی نەهات‌و لە ناوەڕاستی 2014 دا عەلی عەبدوڵا لەگەڵ چەكدارانی حوسی چوونە یەك بەرەوە بۆ دژایەتی حكومەت كە هاوپەیمانی عەرەبی بەسەرۆكایەتی سعودیە پاڵپشتی دەكرد.

دوایین شەڕی یەمەن لە سەنعای پایتەخت لە نێوان چەكدارانی حوسی و هێزەكانی عەلی عەبدوڵا ساڵح ڕویدا، كە ٣ ساڵ بوو ئەو شارە بە هاوبەشی لەلایەن هەردوولاوە بەڕێوەدەبرا، بەڵام لە 29 مانگی ڕابردووداو چەكدارانی حوسی لە گۆڕەپانی سەبعین هێرشیان كردەسەر مزگەوتی ساڵح و پاسەوانەكانیان كوشت و بەشێكیان دەستبەسەركرد، دواتر ماڵی تاریق محەمەد عەبدوڵا ساڵح، برازای عەلی عەبدوڵا ساڵحیان لەگەڕەكی سیاسی گەمارۆدا.

لە سەرەتای ئەم مانگەدا، هێزەكانی سەر بە عەلی عەبدوڵا ساڵح خۆپیشاندان‌و ڕاپەڕینیان دژی حوسیەكان بەرپاكردو زۆربەی دامەزراوە ئەمنی‌و سەربازییەكان‌و فەرمانگەكانی شاری سەنعایان كۆنترۆڵكرد.

000
كۆچی دواییو تیرۆركردنی عەلی عەبدوڵڵا ساڵح
لە 4 مانگی كانوونی یەكەم 2017 بە گوێرەی ئەو زانیارییانەی لایەنگرانی عەلی عەبدوڵڵا ساڵح بڵاویان كردووەتەوە، پێش چوونەدەرەوەی لە سەنعا، چەكدارە حووسییەكان بەڵێنیان پێداوە بە سەلامەتی لە سەنعا بچێتە دەرەوە، بەڵام دواتر بۆسەیان بۆ داناوەو لە ئاكامدا كوژراوە.

یەكێكیتر لە ئاژانسەكان، چیرۆكی كوژرانی عەلی عەبدوڵا ساڵح بە جۆرێك دەگێڕدرێتەوە كە ساڵح لەگەڵ عارف زوكا ئەمینداری گشتی حزبەكەی‌و ژمارەیەك سەركردەی باڵای دیكەدا لە كاتی تێپەڕبونیان بە شەقامی شەست مەتریدا بەرەو شارۆچكەی سەلحان، لەلایەن ٢٠ ئۆتۆمبێلی چەكداری حوسیەكانەوە گەمارۆدراون‌و لەو كاتەدا چەكدارەكان عەلی عەبدوڵا ساڵح‌و عارف زوكایان كوشتووەو خالیدی كوڕی‌و ژمارەیەك سەركردەی دیكەی حزبی كۆنگرەی گشتی گەلیان بە برینداری بەدیل گرتووە.

ئەمەش لەكاتێكدایە كە لە چەند رۆژی رابردوودا عەلی عەبدوڵڵا ساڵح لە بەیاننامەیەكدا لە حووسییەكانی یەمەن هەڵگەڕایەوەو داوایكرد خەڵك لە دژیان راپەڕێت‌و داواشیكرد، لاپەڕەیەكی نوێ لەگەڵ دراوسێكانی یەمەن هەڵبدرێتەوە.
ئاژانسی ئیسنا بڵاویكردەوە، محەمەد ئال جەبر باڵیۆزی سعودیە لە سەنعای پایتەختی یەكەم لە راگەیەندراوێكدا سەبارەت بە كوشتنی عەلی عەبدوڵڵا ساڵح لە تویتەری خۆی رایگەیاند، هەر شتێك كە لەلایەن حوسییەكانوە ئەنجام بدرێت و هەر رووداوێك لەو ولاتە روو بدات بەشێكی لە ئەستۆی ئێراندایە.

ئەو راگەیەندراوەی بەرپرسە باڵایەی سعودیە لەكاتێكدایە كە بەرپرسانی باڵای ئێران تەئكید لەوە دەكەنەوە، هیچ پەیوەندییەكیان بە كێشە ناوخۆییەكانی یەمەنەوە نییە، بەڵكو خودی عەلی عەبدوڵڵا ساڵح ئەوەی راگەیاندووە، كە داوامان لە ئێران كردووە هاوپەیمانێەتییەك لە دژی هاوپەیمانیەتیەكەی سعودیە دروست بكەین، بەڵام ئێمە رەتمان كردەوە.

یەكێك لە بەكارهێنەرانی تویتەر نوسیوێتێ، ئەو كەسەی كە سەرۆكی پێشووی یەمەنی كوشتووە لەكاتی كوشتنەكەیدا پێی وتووە ئەمە لە تۆڵەی حسەینی حوسی باپەبەرزێكی گروپی حوسی شیعە مەزهەبەكانی یەمەنە بووەو لە ساڵی 2004 بە فەرانی ساڵح كوژراوە.
لای خۆشییەوە، عەبدولمەلیك حوسی سەركردەی بزووتنەوەی ئەنساڕوڵڵای سەر بە حوسییەكان لە تۆمارێكی ڤیدیۆییدا پیرۆزبایی لە هاووڵاتیانی یەمەنی كرد و رایگەیاند، ئەمڕۆ رۆژێكی مێژووییە.

وتیشی، زۆر سوپاسی دەزگا ئەمنییەكان دەكەین كە بەرەنگاری ئەو خائینانە بوونەوە و هەوڵێكی زۆریان دا بۆ لەناوبردنیان.
عەبد مەنسور هادی لە تەلەفزیۆنی العربیە كوژرانی ساڵحی راگەیاند و داوای لە هاووڵاتینی یەمەن كرد رووبەرووی حوسیەكان بوەستنەوەو ئاشكراشیكرد، لەمەودوا قۆناغێكی نوێ لە رووبەرووبونەوەی حوسییەكان دەست پێدكەین.

ئاژانسی فەرەنسا بڵاویكردەوە، ئەمڕۆ مەنصور هادی فەرمانی بە هێزەكانی كردووە بڕۆنە نێو سەنعا و دەستبەكار بن بۆ تۆڵە سەندنەوە.

بابەتی دواتر

kobunawa1

توركمانەكانی كەركوك شەڕ لەسەر پۆستی سەرۆكی ئەنجومەن دەكەن

وتەبێژی حەشدی توركمانی ئاشكرایدەكات، ئێمە وەكو كوتلەی توركمانی داوای پارێزگاری كەركوك دەكەین. عەلی حوسێنی وتەبێژی …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *