solaemane

راگەیەندراوی شەش لایەنی سیاسی هەرێمی كوردستان

هەریەكە لە (هاوپەیمانی، گۆڕان، كۆمەڵ، یەكگرتوو، بزوتنەوە، شیوعی) لە ڕاگەیەنراوە هاوبەشەكدا ئاماژەیان بەوەكردووە، ئەنجومەنی كۆمیسیارانی پێكهاتوو لە دادوەران پابەندی جێبەجێكردنی یاسا نەبوون و بڕیاریان دا تەنیا ژمارەیەك سندوقی كەم هەژمار بكرێنەوە.

ڕاشیانگەیاندووە، پێویستە كۆمیسیۆن رێگا بدات بریكارانی لایەنە سیاسییەكان لە نزیكەوە چاودێریی وردی سندوقەكان بكەن و ژمارەی ئەو بریكارانەش زیاتر بكرێت، هەروەها بەراوردكاریی نێوان پەنجەمۆر و باڕكۆدی فۆرمی دەنگدانەكان بكرێت.

دەقی ڕاگەیەندراوەكە:

دەنگدەرانی ئازیز.. هاونیشتمانییانی خۆشەویست..

دوابەدوای بەڕێوەچوونی پرۆسەی هەڵبژاردنی ئەنجومەنی نوێنەرانی عێراق لە رۆژی (12/05/2018) و دەركەوتنی ئەنجامە ساختەكان، ئێمە بە بەڵگەی بنەبڕ و بەپێی رێكارە یاساییە كارپێكراوەكان، تانە و سكاڵامان لەسەر ئەو ئەنجامە ساختانە دا و كۆی پرۆسەكەمان رەت كردەوە، دەرئەنجامی فشار و هەوڵەكانیشمان، یاسای جیاكردنەوە و هەژماركردنەوەی دەستیی سەرجەم دەنگەكان دەرچوو، پاشان لە لایەن دادگای باڵای فیدڕاڵییشەوە پەسەند كرا.

لێرەدا ئەم تێبینی و سەرنجانە دەخەینە بەردەم رای گشتی و كۆمیسیۆن و دامودەزگا پەیوەندییدارەكان:

یەكەم: سەرەڕای دەرچوونی یاسای ژماردنەوەی دەستیی سەرجەم دەنگەكان و پەسەندكردنی لە لایەن دادگای باڵای فیدڕاڵییەوە، بەڵام ئەنجومەنی كۆمیسیارانی پێكهاتوو لە دادوەران پابەندی جێبەجێكردنی یاساكە نەبوون و بڕیاریان دا تەنیا ژمارەیەك سندوقی كەم هەژمار بكرێنەوە.

دووەم: لە سەرجەم قۆناغەكانی پرۆسەكەدا تانە و سكاڵا و راپۆرتی زۆرمان پێشكەش بە دەستە دادوەرییەكە و دامودەزگا پەیوەندییدارەكان كردووە، بەڵام تا ئەم ساتەوەختەش وەڵامی هیچ سكاڵا و تانەیەكمان نەدراوەتەوە.

سێیەم: كۆمیسیۆنی هەڵبژاردنەكان هاوكار نەبووە لە پێدانی زانیاریی سەبارەت بە چۆنێتیی بەڕێوەچوونی پرۆسەكە، هەروەها بەپێی رێكارەكانی كۆمیسیۆن و پەیڕەوی ژمارە (١٣)ی ساڵی (٢٠١٨)، بوار نەدراوە بە چاودێرییكردنی وردی پرۆسەكە لە لایەن نوێنەری قەوارە سیاسییەكانەوە و تەنیا رێگا بە یەك بریكار دەدرێت كە لە دوورەوە چاودێریی پرۆسەكە بكات، كە لە یەك كاتدا سەدان كارمەند سەرقاڵی پرۆسەی هەژماركردنەوەكە دەبن.

هەربۆیە، هاوشێوەی هەڵوێستەكانی پێشوومان داوا دەكەین كە:
1- كۆمیسیۆن یاساكە وەكو خۆی و بەبێ هیچ لادانێك جێبەجێ بكات و سەرجەم سندوقەكان هەژماركردنەوەی دەستییان بۆ بكرێت.

2- پێویستە كۆمیسیۆن رێگا بدات بریكارانی لایەنە سیاسییەكان لە نزیكەوە چاودێریی وردی سندوقەكان بكەن و ژمارەی ئەو بریكارانەش زیاتر بكرێت، هەروەها بەراوردكاریی نێوان پەنجەمۆر و باڕكۆدی فۆرمی دەنگدانەكان بكرێت.

3- پێویستە كۆمیسیۆن و دەستە دادوەرییەكە وەڵامی سكاڵا و تانە یاساییەكانی ئەم لایەنانە بدەنەوە.

بەپێچەوانەوە، پرۆسەی هەژماركردنەوەی دەستیی ژمارەیەكی كەمی سندوقەكانی دەنگدان، پێچەوانەی یاسا و رێنماییەكان و شەرعییەتدان دەبێت بە پڕۆسەی ساختەكاریی.

٨ ی تەموزی ٢٠١٨

بابەتی دواتر

405113Image1

لابردنى خاڵه‌ گومرگیه‌كانی نێوان هه‌رێم و به‌غدا نزيكه

ڕێكه‌وتنه‌كه‌ی نێوان هه‌رێم و به‌غدا له‌باره‌ی خاڵه‌ گومرگییه‌كان ده‌خرێته‌ بواری جێبه‌جێكردنه‌وه‌، به‌ڕێوه‌به‌ری گومرگی هه‌رێم له‌باره‌ی …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *