1016778_486779041403625_1221301673_n

ئیسڵاح، وه ك پرۆژەیەکى تەواوکاری

ن. شۆرش کەمال
ئیسڵاح، پرۆژەیەکى تەواوکاریە، دەکرێ پلانى خێراوکورت و دوور مەوداشی هەبێ، دەوڵەت و دامەزراوە کاربکەن بۆ ئامانجە دوورونزیکەکانى خزمەت و چاکسازى کۆمەڵایەتى و سیاسی و ئابورى و بوژانەوەى سێکتەرە پەککەوتووەکان و سەرلەنوێ چالاککردنیان…
ئیسلاح لە کوردستان قورسترین ئەرکە بۆ هەر حیزب و قەوارەو ڕێکخراوێک بیەوێ کاری تێدابکات، هۆکارەکەشی بریتیە لە نەبوونى دامەزراوەى شەرعی و سەربەخۆ.. چونکە ئەوەى ئێستا لە کوردستانە ناتوانرێت پێی بوترێت دامەزراوە یان حکومەت و هەر لە بنەڕەتەوە درێژکراوەى ئەجنداو بەرژەوەندی دوو حیزبی دەستەڵاتە واتا “پارتى و یەکێتى”.
لە 27 ساڵى حوکمڕانى سەقەتى کوردى تا ئەمڕۆ ئەو دوو حیزبە نەیانهێشتووە دامەزراوە و سیستم دروستببێت لە هەرێم چونکە بەرژەوەندیە تایبەتە حیزبییەکەیان وادەخوازێ و تەنها دەتوانن لە دۆخى ئاوی لێڵ ڕاوبکەن و لنگى حیزبیان شۆڕکردوەتەوە بەسەر هەموو بەرژەوەندییە نیشتمانى ئیداری و ئابوریەکان تا ئەو ئاستەى ژێرخان و سەرخانى ئابورى و سامانى وڵات ئێستا چەندکەس و بنەماڵەیەک لە کوردستان خاوەندارى دەکەن و حکومەت و پەرلەمان و سیستم هەموى خۆیان لە ئەنجومەنى خێزانى لەماڵەوە بڕیاری بۆ دەردەکەن و بە فەرمان دایدەگرن بۆ سەرۆک وەزیرو سەرۆک پەرلەمان و وەزیرەکان و بەڕێوەبەرە حیزبییەکانى خۆیان، هەربڕیارێکیش دژ بە حیزبەکانى خۆیان و بەرژەوەندیەکانیان بێتەوە هەرزوو لەبارى دەبەن…
کاری ئیسڵاحى لە ژینگەیەکى ئاوا بێ سەروبەردا زۆرقورس دەبێ و گەر بەڵێنی زیاد لە توانا بەخەڵک بدرێ نالۆژیکییەو کەسیش ناتوانێت باوەڕی پێبکات.. لێرەوە دەبینین ختوکەدانى باری سایکۆلۆجى و عاتفى خەڵک بۆمەرامى دوو حیزبی دەستەڵات تەنها خۆی لە باسکردنى هەستى نەتەوایەتى و ئازایەتى پێشمەرگەو داستانى قارەمانێتى و پلانى بڕینى موچەو تۆمەتبارکردنى بەغداو موژدانەى ئەم بەرپرس و ئەو بەرپرسە بۆ ڕوبعە موچە دواکەوتووەکە.. لەکاتێکدا بەپێی هەموو داتاکانى ئابورى و دارایی خەڵک قەناعەتى تەواوى هەیە شتێک نییە ناوی قەیرانبێ لە هەرێم، ئەوەى هەیە زوڵم و ستەمى بێ باگانەى ئەو دوو حیزبەیە لەخەڵک، چونکە موچەخۆرانى هەرێم نیوەى ئەو ژمارەن کەباسی لێوەدەکرێ، نیوەکەى ترى چڵکاوخۆرانى حیزبن بەسەر بودجەو موچەى فەرمانبەرانی هەرێمەوە دەلەوڕێندرێن…
بۆیە کارى چاکسازی بنەڕەتى کورت مەودا لەم دۆخەى ئێستاى کوردستان ناکرێ و هێشتاش خەونێکە هەر قەوارەو حیزب و هێزێکیتر جگە لەوە بڵێ تەنها بۆ پڕوپاگەندەى هەڵبژاردنەکانەو هیچیتر…
لیستى ئیسڵاح لەو ڕاستیە گەیشتوە هەرێم پێویستی بە چارەسەرى بنەڕەتى گەندەڵکارانەو کار بۆ پلانى دوورمەوداو چاکسازى ڕاستەقینەدەکات و بڕوای وایە بەبێ بە “سیستماتیک” کردنى دامەزراوەکان و دوورخستنەوەى دەستى حیزب چاکسازى ڕاستەقینە ناکرێت، ئیسڵاح سەبرو خۆڕاگری و قوربانى دەوێ.

 

ش.ك

بابەتی دواتر

10888775_978867758808748_4146759750523283446_n

ڕەونەقی ئاهەنگەکانی مەولودی پێغەمبەر(درودی خوای له‌سه‌ر بێت)و کاڵبونه‌وه‌ی سوننه‌ته‌کانی   لیلی علی یادی مه‌ولودی پێغه‌مبه‌ر(درودی …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *