پارێزگاری کەرکووک وەڵامی عەسائیبی ئەهلی حەق دەداتەوە

پارێزگاری کەرکووک وەڵامی عەسائیبی ئەهلی حەق دەداتەوە و دەڵێت ئەوان خەڵکی کەرکووک نین و نازانن لە کەرکووک چی هەیە. دەربارەی ئەوەی کە هەڵکردنی ئاڵای کوردستان دەستووری نییە پارێزگاری کەرکووک دەڵێت، ئەنجوومەنی پارێزگا بڕیار دەدات هیچ بڕگەیەک لە دەستوور نییە رێگە لە بڕیاری ئەنجوومەنی پارێزگا بگرێت چونکە نوێنەرایەتی هەموو خەڵکی کەرکووک دەکات. 

ئەمە لەکاتێکدایە عەسائیبی ئەهلی حەق، داوای لە سەرکردایەتی یەکێتی کردبوو، لە هەڵوێستە نیشتمانییەکانی جێگیربێت و چاو لە مەسعود بارزانی نەکەن کە هەوڵی دوو لەتکردنی عێراق دەدات.

بڕیارێکی پارێزگاری کەرکووک وایکرد نەورۆزی ئەمساڵی شارەکە جیاوازتربێت، بە بڕیارێکی نەجمەدین کەریم، ئاڵای کوردستان لە تەنیشت ئاڵای عێراقدا بەرزکرایەوە. ئەم بڕیارەش بەشێک لە کەرکووکییەکانی دڵخۆشکرد و بەشەکەی دیکەش کە عەرەب و تورکمانەکانن نیگەرانن.

لە کاردانەوەیەکیدا گرووپی عەسائیبی ئەهلی حەق، داوای لە سەرکردایەتی یەکێتی نیشتمانی کوردستان کرد، لە هەڵوێستە نیشتمانییەکانی جێگیربێت، هەمان هەڵسەوکەوتی مەسعود بارزانی پیادە نەکات.

مەکتەبی سیاسی عەسائیبی ئەهل حەق لەبارەی هەڵکردنی ئاڵای کوردستان لە کەرکووک بەیاننامەیەکی بڵاوکردەوە و تێیدا رایگەیاندووە، “بەشێوەیەکی چاوەڕەواننەکراو پارێزگاری کەرکووک، فەرمانی هەڵکردنی ئاڵای کوردستانی لەسەر فەرمانگەکانی کەرکووک لە پاڵ ئاڵای عێراقی دەرکردووە، کە سەرپێچییەکی روونی دەستوور و، پابەندبوون و هەڵوێستە سیاسییە رەسەنەکانی یەکێتی نیشتمانی کوردستانە، کە پارێزگاری کەرکووکیش یەکێکە لە سەرکردە گەورەکانی”.

پێشتریش نێردەی نەتەوە یەکگرتووەکان لە عێراق “یۆنامی” لە راگەیێندراوێکدا ئاماژەی بە هەڵکردنی ئاڵای کوردستان لەسەر قەڵای کەرکووک کرد و گوتی “یۆنامی نیگەرانە لەبارەی دوایین بڕیاری پارێزگاری کەرکووک بۆ هەڵکردنی ئاڵای هەرێمی کوردستانی عێراق، لەسەر قەڵای کەرکووک”.

ئێوارەی رۆژی 20-3-2017 بە ئامادەبوونی پارێزگار و سەرۆکی ئەنجوومەنی پارێزگای کەرکووک بە وەکالەت و بەرپرسانی ئیداری و حیزبی شارەکە، لەگەڵ کردنەوەی ئاهەنگی نەورۆز، ئاڵای کوردستان لەسەر قەڵای کەرکووک هەڵکرا.

ئەو دوو ئاڵایەی لەسەر قەڵای کەرکووک هەڵکران، بە درێژی 10 مەتر، پانی پێنج مەتر و بە بەرزی 20 مەتر، بۆ هەمیشە و بە فەرمی دەمێننەوە، لەکاتێکدا پێشتریش پێکهاتە سیاسییەکانی عەرەب و تورکمان دژایەتی ئەو هەنگاوەیان کردبوو.

لە نووسراوێکی پارێزگاری کەرکووکدا، کە رۆژی 14-3-2017 واژۆکراوە و ئاراستەی ئەنجوومەنی پارێزگا کراوە، پارێزگاری کەرکووک رایگەیاندبوو، بەبۆنەی یادەکانی نەورۆز و، لەبەرئەوەی کەرکووک ناوچەی کێشە لەسەری نێو ماددەی 140ـی دەستووری عێراقە، داوا دەکات ئەنجوومەنی پارێزگا بڕیاربدات بە هەڵکردنی ئاڵای کوردستان لەتەنیشت ئاڵای عێراق لە هەموو فەرمانگە و کۆمپانیاکان و لە بۆنە و یادە فەرمییەکاندا.

دوای نەورۆز ئەنجوومەنی پارێزگای کەرکووک بەرزکردنەوەی ئاڵای کوردستان لە فەرمانگەکانی کەرکووکدا دەخاتە دەنگدان، لیستی برایەتی دڵنیان لەوەی بە زۆرینەی دەنگ پێشنیازەکە پەسنددەکرێ، چونکە لە کۆی 41 ئەندامی ئەنجوومەن، 26 دەنگی لیستی برایەتی لە دەنگداندا مسۆگەرن.

بابەتی دواتر

وەزیری كشتوكاڵ لەبارەی ساختەكردنی نوسراوێكی رونكردنەوەیەك بڵاودەكاتەوە

دوای ئه‌وه‌ی كه‌سێك به‌ نووسراوێكی ساخته‌، كه‌ ئیمزای وه‌زیری كشتوكاڵی به‌ ساخته‌ خستووه‌ته‌ سه‌ر، هه‌وڵی …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *