مامۆستایانی ناڕازی: خۆپیشاندان لە نزیكترین كاتدا دەستپێدەكاتەوە

باسك نێت

لە راگەیەندراوێكدا كۆمەڵێك مامۆستای ناڕازی ئاماژە بۆ ئەوە دەكەن، لەبەرئەوەی گەمارۆی ڕاگەیاندنمان لەسەرەو هێزە ئەمنییەكان ڕێگە نادەن لە هیچ شوێنێكی شاردا چەند مامۆستایەك پێكەوە گردببنەوەو دەستگیر دەكرێن ئەم بەیانە لە ڕێی تۆڕە كۆمەڵایەتیەكانەوە بڵاو دەكەینەوە.

دەقی بەیانامەی مامۆستایانی ناڕازی

بۆ ڕای گشتی
لای هەمووان ئاشكرایە لە سەرەتای ساڵی ۲۰۱٥ مامۆستایانی ناڕازی و فەرمانبەران و چین و توێژەكانی تر بە شێوەی مەدەنیانە ناڕەزایەتی دەردەبڕن و داوای چارەسەر كردنی كێشەكانی هەرێم و قەیرانی دارایی و گرفتی موچە دەكەن ،هەرگیز خوازیاری ئەوە نەبووین بارودۆخەكە بگات بە توندوتیژی و ئەم ڕۆژە ، بەڵام دەسەڵات و حكومەت ئەو شێوازەیان نادیدە گرت و بێ منەت بوون لە توڕەیی جەماوەرو بەردەوام بوون لە دەسی دەسی كردن بە مامۆستایان و فەرمانەبەران و چین و توێژەكانی تر .
مامۆستایانی ناڕازی بۆ گەیاندنی خواست و داواكانی لە هەموو دەرگاكانی دا ، هۆشداریمان پێ دان كە بەدیلی شێوازی ئاشتیانە توندوتیژیە خەڵكیش ڕۆژێ دێ پەتی ئارامی دەپسێ .
لە ئێستاشدا كە بارودۆخ گەشتۆتە ئەم ڕۆژە لولەی تفەنگیان كردۆتە سنگی خۆپیشاندەران ،حكومەت و دەسەڵات لێی بەرپرسیارە و دەڵێین :
۱-پرسەو سەرەخۆشی ئاڕاستەی شاری ڕانیە و كەس و كاری شەهیدەكان دەكەین و هیوای چاك بوونەوە بۆ بریندارەكانی هەموو شارەكان دەخوازین .
۲-ئیدانەی توندو تیژی دژی خۆپیشاندەران و شەهید كردنی خۆپیشاندەران و دەستگیر كردنیان دەكەین
۳-داوا لە مامۆستایان دەكەین بەردەوام بن لە ڕاگرتنی دەوام و بایكۆت ، شەرمە بۆ مامۆستایەك هاوڕێكەی لە زیندان بێت شەهید كرابێت و ئەو بێ دەنگ بێت
٤- داوا لە حكومەت دەكەین پەلە بكات لە هەنگاوەكانی چارەسەركردنی قەیرانەكان ئەگەر حكومەت هەنگاوی هەیە وەگرنا با وازبێنن و حكومەت هەڵوەشێننەوە
٥- داوا دەكەین دەست بەجێ گیراوەكان ئازاد بكرێن
٦- داوا دەكەین ڕێگە بدەن خۆپیشاندانی مەدەنیانە دەست پێبكاتەوەو هێزو چەكدارەكان لە ناوشارەكان بكشێننەوە
۷-بەدڵنیایەوە ئەگەر دەست بەجێ گرفتەكان چارەسەر نەكرێت خۆپیشاندان و فشاری مەدەنیانە لە نزیكترین كاتدا سەرهەڵدەداتەوە بۆ وەرزی دووەم هەرلەسەرەتای وەرزەوە بایكۆتی گشتی بە فەرمی لە كۆنگرەی ڕۆژنامەنووسیدا ڕادەگەیەنین
۸-لە بەر ئەوەی گەمارۆی ڕاگەیاندنمان لەسەرەو هێزە ئەمنیەكان ڕێگە نادەن لە هیچ شوێنێكی شاردا چەند مامۆستایەك پێكەوە گردببنەوەو دەستگیر دەكرێن ئەم بەیانە لە ڕێی تۆڕە كۆمەڵایەتیەكانەوە بڵاو دەكەینەوە ….
كۆمەڵێك مامۆستای ناڕازی / سلێمانی
۲۱/۱۲/۲۰۱۷

بابەتی دواتر

پاشەزەوتی مووچە کە هێشتا بەردەوامە!!

(ڕوونکردنەوەیەک لە ژێر ناونیشانی : پاشەزەوتی مووچە کە هێشتا بەردەوامە ) بۆ ئەو فەرمانبەرانەى چەندساڵە …

وەڵامێک بنووسە

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *